最近有幾位年輕嘅讀者，不約而同地問，應唔應該過嚟荷蘭讀書，然後搵工呢？
以「讀書」作為移居外地嘅方法，相比起其他途徑，例如較為熱門嘅投資移民，成本相對低好多，而且讀完書之後自己有多一個學位傍身，對於好多年青一輩又想出走嘅人來講非常合適。今次想同大家講一講當中嘅風險。
第一，有碩士學位≠搵到工。
有留意開我文章嘅朋友，大多都會知道，荷蘭普遍教育水平較高。唔少大公司招聘嘅最低要求都要碩士畢業。講真，喺街度求其搵個年青人閑閑哋有一兩個碩士學位真係不足為奇。
能唔能夠搵到工，視乎個人能力、工作經驗、人際網絡等等。而且當人人都有差唔多學歷嘅時候，即使你係讀「神科」都唔擔保一定會搵到工。
第二，你容許自己喺荷蘭搵幾耐工？
喺荷蘭大專院校畢業之後，學生可以申請一年居留簽證 (orientation year visa)。唔少人喺呢一年時間入邊搵工。有人成功搵到全職，有人要先實習一段時間先至可以再搵到工。呢個時候你要問下自己：你經濟能力如何？你可以承受到幾耐冇收入而無止境地搵工？如果一年之後都搵唔到工，只能夠返香港，你又會點？
第三，唔係身邊所有人都會明白你嘅困境。
好多海外留學生（例如筆者）會選擇喺就讀期間不斷搵工，甚至係入邊返實習入邊返學。即使係身邊嘅同學，或者學校嘅老師，都未必會明白點解你要咁做。之前嘅文章提過，一般歐盟學生可以「延期畢業」，然後喺學校繼續註冊，用學生身份返實習。但係由於延期畢業對海外留學生來講成本非常高（繼續交學費），唔少歐盟以外嘅學生就會喺在學期間好努力咁返實習。
而有啲長期喺象牙塔嘅教授，亦都唔理解點解學生嘅苦況。我曾經遇過一位老師，非常離地，直情當住全班面話：「我後生嘅時候都唔需要返實習，真係唔明你哋而家班年輕人點解要咁博命⋯」
其實「搵到工」只不過係移居海外慢慢長路嘅起點。當你以為，搵到份工就可以放鬆一下嘅時候，千祈唔好咁快鬆懈。我見過有人幾經辛苦終於攞到大公司嘅合約，點知做咗一年多少少就俾人因為疫症裁員；又有人喺荷蘭兩三年之後，結果都要返去香港。
雖然困難重重，但成功留喺荷蘭嘅嗰一批人，生活都相當唔錯。做任何事都有相應嘅風險，唔可能一帆風順。希望大家作決定嘅時候都要考慮返自己能夠承受幾多壓力，量力而為。加油！
#荷蘭 #阿姆斯特丹
#海外移住 #海外生活
#歐洲 #移民歐洲
#留學 #留學生活
#香港人加油
Search